Mikilvægt er að meðhöndla veiddan fisk þannig að ferskleiki haldist .  Best er að blóðga fiskinn strax og gera síðan að honum þegar honum er hætt að blæða.   Að því loknu þarf að kæla hann t.d. með því að strá yfir hann ís.  Snjallt að verða sér úti um kassa úr frauðplasti og fara með þá fulla af ís til veiða og fulla af fiski til baka.  Þegar heim er komið þarf svo að ganga frá honum í frysti í loftþéttum umbúðum sem fyrst þ.e. ef ekki á að borða hann strax.  Við höfum þann háttinn á að flaka fiskinn strax og frysta síðan. 

Flökun er ekki flókin og er hér gerð tilraun til að sýna handbragðið.  Afar mikilvægt er að flökunarhnífurinn bíti vel.

1.  Skerið aftan við tálknin - alveg að hrygg - beita hnífnum aðeins fram á við	2.  Snúið hnífsblaðinu og skerið aftur með hryggnum - láta hnífinn fylgja hryggnum til að fá sem besta nýtingu
3.  Fyrra flakið tekið frá	4.  Fiskinum er svo snúið við og leikurinn endurtekinn
5.  Hnífnum er svo brugðið undir þunnildabeinin og þau skorin burt	6.  Flakið klárt.  Margir plokka síðan beinagarðinn úr með töng.  Ég nenni því yfirleitt ekki fyrr en komið er að því að matreiða
Ef þarf að roðrífa þá er hér aðferð
1.  Losa fiskinn frá roðinu við styrtluna  ( næst sporði)	2.  Ná góðu taki á roðinu.  Beita hnífnum niður á við og hreyfa hann aðeins á meðan togað er í roðið og það rifið frá með aðstoð hnífsins.
3.  Roðið laust frá.  Hér var bleikja roðrifin - ansi erfitt að ná taki á roðinu sem er bæði þunnt og sleipt